كسرت فتاة تدعي أسماء صالح العادات والتقاليد المجتمعية، وأعلنت عن رغبتها في الزواج في مؤشر يدل عن عزوف الشباب عن الزواج، حيث نشرت عبر حسابها الرسمي على موقع التواصل الاجتماعي فيسبوك قائلة: أنا عايزة أتجوز.. بقولها ببساطة، ومن غير كسوف، ومن غير ما أحاول أجمّل الجملة أو ألف حوالينها.
وأضافت: أنا وصلت لمرحلة في حياتي عندي فيها رغبة حقيقية وواعية إني أكون أسرة، وأعيش علاقة مستقرة، وأشارك حياتي مع شخص يكون شريك حقيقي ليا، وبصراحة، بحكم طبيعة شغلي ودائرتي الاجتماعية، فرص التعارف عندي محدودة جدًا.
حياتي مش مليانة دوائر اجتماعية أقدر من خلالها أتعرف على رجال مناسبين
وأوضحت: شغلي أغلبه أطفال وأمهات، وحياتي مش مليانة دوائر اجتماعية أقدر من خلالها أتعرف على رجال مناسبين بشكل طبيعي فعشان كده، قررت أقول للناس القريبة مني: لو تعرفوا شخص مناسب، ممكن ترشحوه ليا. ومش قصدي «أي شخص» طبعًا، أنا عندي حياة وطموحات ببنيها، وبدرس حاليًا مجال جديد في الجامعة، وعندي طموح إني أكمل فيه لحد الدكتوراه، وعندي مشروع نفسي أوصله لمكان كبير جدًا.. فأنا محتاجة شخص يشوف طموحي جزء جميل من شخصيتي، مش حاجة محتاجة تصغير أو تنازل.
ولفتت: شخص يكون عنده طموحه وحياته، ونقدر كل واحد فينا يشجع التاني ويكبر معاه، مش يقف قدامه، والترشيح بالنسبة لي هيكون مجرد ترشيح، مش التزام، لو حد رشح لي شخص وطلع مش مناسب، بمنتهى البساطة هقول «مش مناسب ليا»، ولو شايفة إنه ممكن يناسب واحدة من صديقاتي، ممكن أرشحه ليها
واستكملت: في نفس الوقت، أحب أوضح نقطة مهمة جدًا.. أنا مش هقبل ترشيحات من أشخاص أنا معرفهمش، ومش معنى البوست إن أي شخص يشوفه يدخل يكلمني أو يبعتلي طلب صداقة.. بالعكس، أي شخص غريب يتواصل معايا مباشرة بخصوص الموضوع ده، غالبًا هيكون مصيره الـ Block بكل حب.
ولفتت: أنا بكتب الكلام ده لأنني مؤمنة إن الرغبة في الزواج وتكوين أسرة احتياج إنساني طبيعي، وإن الاعتراف باحتياجنا مش ضعف، ولا يقلل من قيمتنا.. والبنت مش بتخسر من كرامتها لما تقول: «أنا عايزة أتجوز».
عايزين ننجح ونسافر
ولفتت: زي ما من حقنا نقول إننا عايزين ننجح، ونسافر، ونتعلم، ونكبر في شغلنا، من حقنا برضه نقول إننا عايزين بيت وأسرة وشريك حياة.. بالنسبة لي، الكلام ده مش خارج من احتياج أعمى، ولا خوف من الوحدة، ولا رغبة في إن «أي حد وخلاص» يبقى موجود.. ده قرار طالع من وعي بمرحلة أنا فيها دلوقتي، ومن رغبة حقيقية إني أشارك الحياة مع شخص مناسب.. فلو أنت/أنتِ من الناس اللي أعرفهم، وعندك ترشيح حقيقي ومحترم لشخص مناسب، ابعتهولي.. يمكن ببساطة يكون فيه شخص مناسب ليا، وأنا بس لسه ما اتقابلناش
