قالت الصفحة المنسوبة الى الفنان تامر حبيب عبر الفيس بوك تعقيبا على المنشور الذي قال انه شرب في منتصف الطريق اثناء الصيام لاسباب مرضية و ذالك تضامنا مع قصة سيدة كشري التحرير و قال في التعقيب
طيب، تعقيب علي الپوست اللي فات و اللي كتبت فيه عن موضوع الست المسيحية و بنتها او ابنها و محل الكشري، و خبر تكفير اللي يشتري اكل في نهار رمضان اللي انتشر في المصري اليوم… انا فوجئت من بعد مانزلت الپوست بربع ساعة باتصالات لامنتهية و لغاية دلوقتي حالاً و ان البوست اتعمله اكثر من ٣٠٠ شير !!!!! و اللي عرفته ان كالعادة حصل عليا هجوم رهيب و اتشتمت و جبت الشتيمة لامي و ابويا الله يرحمهم في الايام المفترجة دي، و ربنا يجعله في ميزان حسناتنا، و اتقالي ان البعض كفروني كمان و المتسامحين منهم اتهموني بالإجهار بالمعصية. و طبعاً لأني باشتغل في الفن و راجل حر و مؤمن بالحرية و باحضر حفلات و مهرجانات و اعياد ميلاد و بارقص و اضحك و اهرج و احاول ان استمتع و يكون حضوري ايجابي و صحبتي مش تقيلة، و بأحترم نفسي و بأحترم الآخر و احترم حريته، و يمكن علشان كده الحمدلله ربنا محبب فيا ناس كتير و الف حمد و شكر ليك يا رب و ديم عليا النعمة دي و احفظها من الزوال، عرفت برضه ان السلخ جامد قوي… و بجد و رحمة امي و ابويا انا ما قريت اي تعليق سلبي او ايجابي غير اللي علي الپوست هنا، و اعتذرت لكل الاساتذة المعدين اللي طلبوا مني اعمل معاهم مداخلات اوضح فيها موقفي و ادافع عن نفسي من التعليقات و اعتذرت لهم جميعاً مشكورين لأني مش شايف انه موضوع و لا من هواة التريندات و مابحبهاش… انا بس عايز اوضح لي اللي نيتها او نيته صافية من اللي ممكن يكونوا فهموا البوست غلط، او ماوصلهومش اللي قصدته، و اكرر بأوضح فقط للناس اللي نيتها صافية، و دول اقلية قليلة جداً زي ماحنا عارفين… و الباقي و اللي هما الاغلبية العظمي بنواياهم المختلفة الغير صافية و لا محترمة و اللي كلنا بقينا عارفينهم كويس مش فارقين معايا بالمرة و المصحف الشريف، و لا توضيحي هايفرق معاهم علشان هنا كده كده هما هايبخوا سمهم عشان ده اكل عيشهم… آسف علي الإطالة، ارجع و اقول حابب اوضح لاصحاب النوايا الطيبة، اني قصدت بالپوست السابق، اني استفزني الخبرين اللي قريتهم و قلقوني لما يحتويه ما بين سطورهم من خطورة علي مجتمعنا اللي اتربيت طول عمري علي انه مجتمع وسطي يحترم الآخر، و اهلي علموني ماخفش من التفكير، و ان عقلي ده نعمة عظيمة من ربنا حرام عليا ماستخدمهاش. الخبرين اللي قريتهم ورا بعض في نفس اللحظة قبضوني و كئبوني، علشان ربنا الرحمن الرحيم السلام الكريم الغفار اللطيف الحليم الغفور ميرضيهوش لا اللي حصل في محل الكشري و لا اتكتب في خبر الجرنال. و من قبضتي و ضيقي، عبرت عن غضبي باني شربت سيجارة و مية في الشارع، احتجاجاً علي ما استفزني… يعني لا إجهار بمعصية، لإني اصلاً مش قابل ان يتقال عليها معصية، و لا الموضوع ليه اي علاقة بالدين و لا العقيدة… اللي اصلاً مافيش مخلوق علي وجه الارض مسموحله يتدخل فيها… انا قصدت اقول ان استفزازي من اللي قريته، زاد من غضبي و عدوانيتي، و ده انا شايفه خطر، و كتبت في الپوست انه خطر كبير، لانه فعلاً خطر كبير… مرة تانية آسف علي الإطالة… و رمضان كريم يا كل المصريين و كل الناس اجمعين… و ربنا اسمه الرحيم ?????
