أعلنت مراسلة قناة dmc أميمة بدري فقدانها النطق بعد تعرضها لأزمة نفسية شديدة، أدت إلى فقدانها القدرة على الحديث والكلام، الأمر الذي أثار جدلاً.
ونشرت أميمة بدري منشور استغاثت فيه وتطلب المساعدة عبر صفحتها على فيسبوك وعلقت قائلة: “أنا محتاجة حد يساعدني ارجوكم أنا فجأة فقدت النطق مش عارفه أنطق ولا اتكلم وشفتي طبقت زي البكم والصم وصوتي مش طالع ومش قادرة اخد نفسي انا خايفه ومش عارفه اعمل ايه انا تعبانه جدا ومش قادرة انا مخضوضه من اللي حصلي”.
وبعد ساعات من منشورها وجهت الشكر إلى جمهورها وطلبت الدعاء لها، حيث نشرت صورة للتحاليل التي أجرتها وكتبت: “الحمد لله رب العالمين على كل حاجة حصلت ليا، أنا بكتب وانا مش قادرة لاطمنكم أنا روحت المستشفى وعملت الأشعة المقطعية على المخ”.
وأضافت: “الحمد لله مفيش جلطة بس للاسف فقدت النطق بسبب إني زعلت جامد أدعولي دعوة صادقة، أنا محتاجة لدعواتكم وشكرا لكل اللي بيكلمني بس حرفيا مش قادرة من الصدمة”.
وتابعت أميمة بدري: “أنا دكتور كتبلي أدوية وقالي لازم ارتاح تمامًا وخلال 3 أيام لو مش اتحسنت ورجعت اتكلم هتابع مع دكتور أعصاب واعمل جلسات كهرباء لأعرف أتحسن ادعولي اعرف انطق تاني وأرجع لحياتي”.
واختتمت: “أنا نفسيا مش أحسن حاجة دعواتكم وشكرا للتواصل معايا ولكل واحد حاول يكلمني ويساعدني وشكرا للي جالي البيت ووداني المستشفى دعواتكم، واللي يعرف الأدوية دي تمام ولا حد يقولي أعمل إيه لأن أنا قلقانة”.
وبعدها، ظهرت أميمة بدري، في فيديو عبر فيسبوك، تظهر فيه وعليها علامات صعوبة التحدث وعدم القدرة على نطق الكلام، ولكنها تحاول طمأنة جمهورها، معلنة سبب فقدانها للنطق وهو تعرضها لأزمة نفسية.
وقالت أميمة بدري: “أنا تمام بس ادعولي، أنا مش عارفة أتكلم، وتبيّن على ملامح وجهها البكاء الشديد خلال محاولتها التحدث”.
وعلقت أميمة على الفيديو قائلة: “شكرًا لكل حد بيسأل وبيطمن عليا بس ده حالي، وصوتي طلع حبة الصبح مكانش في أي صوت، ولا حركة شفايفي ولسة تعبانة، فمش عارفة ولا قادرة أتواصل قُلت أطمّنكم بحالي هنا أسهل، دعواتكم والحمد لله علي كل شيء.. وبقولكم آسفة لكل حد بيطمن، ومش عارفة أرد بس ادعولي أكون كويسة”.
