فجر الإعلامي أحمد شوبير، مفاجأة من العيار الثقيل بشأن أخر تطورات ملف تجديد عقد حسين الشحات، لاعب الفريق الأول لكرة القدم بالنادي الأهلي مع القلعة الحمراء، خلال الفترة المقبلة.
وقال شوبير في تصريحات عبر برنامجه الإذاعي: “لحد امبارح حسين الشحات كان متضايق، كان هيقعد مع أمير توفيق، لكن سيد عبد الحفيظ تدخل وطلب إن الجلسة الأولى تكون معاه، بعيدًا عن حسابات الفلوس والشد والجذب اللي بيحصل في الجلسات دي”.
وتابع: “كولر كمان طلب يقعد مع اللاعب، وقاله انت لاعب هايل وأنا مبسوط منك وانت فرقت جامد مع النادي الأهلي، وكان ليك دور كبير جدًا وأنا حابب إنك تستمر في النادي”.
وواصل شوبير: “كولر قال الأهلي هو الجماهيرية والشعبية وحب الناس، وانت ليك دور مهم وأساسي في الفريق، وعايز إنك تكمل، وقاله أنا لسه في عقدي سنة لكن إحنا كمدربين ممكن النتائج تتحكم في مستقبلنا، لكن أنا بقولك خليك هنا”.
وأوضح: “حسين كان هادي جدًا ومرتاح ومبسوط وفي حالة معنوية عالية، وقعد مع سيد عبد الحفيظ، والأخير قاله إنه هينقل موافقته للإدارة واللاعب وافق”.
واختتم شوبير تصريحاته: “في النهاية، حدثت انفراجة كبيرة بالأمس في قصة تجديد حسين الشحات مع الأهلي”.
