كشفت التحقيقات في القضية رقم 2707 لسنة 2023، تفاصيل مقتل شاب سوداني الجنسية على يد شخصين الأول يدعى إسماعيل.ع، 27 سنة، والثاني محمد.ش 26 سنة، بعد أن استدرج المتهمان المجني عليه بأحد العقارات المملوكة للمتهم الأول لسرقة مبلغ مالي منه في منطقة بولاق الدكرور.
وقال المتهم محمد.ش، أمام جهات التحقيق: بعد ما إسماعيل المتهم الأول في القضية ضرب الشاب السوداني بالطوب قام مفتش الواد ومطلع من جيوب بنطلونه التليفون والمحفظة بتاعته وقلعه الساعة اللي كان لبسها في إيده الشمال وساعتها أنا كنت مخضوض من اللي عمله وقعدنا أنا وهو نفكر نعمل إيه في جثة السوداني.
وأوضح المتهم: بعد ما فكرنا اتفقنا أنا وإسماعيل إننا نجيب ماية نار من الورشة بتاعته وندلوقها على الجثة عشان تتحلل ومحدش يعرف إن دي جثة بني آدم وساعتها أنا فضلت جنب جثة الواد وإسماعيل نزل الورشة بتاعته وجاب ماية نار في أربع إزايز بلاستيك في شنطة بلاستيك بيضة وراح مفضي أربع إزايز ماية النار عليه وساعتها جثة الواد بقت عمالة تبقلل وجلده كان بيسيح وبيشيط بس بردو الجثة مدبتش زي ما كنا متوقعين.
وأضاف المتهم: بعد ما فشلنا في إذابة الجثة قام إسماعيل نزل الورشة تاني وجاب زيت بتاع مواتير الثلاجات والغسالات وجابه في إزازة ماية كبيرة مليانة زيت وقعد يغرق فيه ودلق حوالي نصها عليه وجيه يولع فيه بالولاعة بس الجثة مولعتش عشان الزيت كان تقيل وهو دلق كتير قام نازل جاب بنزين من الموتسيكل بتاعه وطلعلي تاني ومعاه إزازة بلاستيك فيها البنزين وفضاها على الواد السوداني وولع فيه بالولاعة وساعتها الجثة ولعت ولعة جامدة وقالي يالا بينا.
وأشار المتهم قائلا: بعد ما حرقنا الجثة خدنا بعضنا ونزلنا في الشارع قسمنا الحاجة اللي قلبناها من الواد وأنا خدت الساعة وإسماعيل خد التليفون والمحفظة ومرضيش يقولي المحفظة كان فيها كام وساعتها كانت الساعة 2 الفجر وبعدها إسماعيل ركب المكنة وروح على بيته وأنا اتمشیت وروحت على بيتي طلعت نمت.
