حرصت الفنانة حورية فرغلي، على طمأنة محبيها، بعد إجرائها عملية استئصال الرحم إثر إصابتها بورم، وأمر الأطباء بعدها بسرعة إجراء الجراحة.
وقالت حورية فرغلي خلال حوارها مع قناة art: عايزه أقول مدام صفاء أبو السعود بتفرج عليكي من وأنا صغيرة وطول عمري كان نفسي أكون ضيفة في حلقات حضرتك.. شكرًا إنك افتكرتيني وبحبك أوي ونفسي نتقابل على الحقيقة.
وأضافت حورية فرغلي: عايزة أشكر هوانم الزمن الجميل مدام ليلى علوي وصفية العمري وميرفت أمين وإلهام شاهين، وأشرف زكي ومادلين طبر وسميرة سعيد، ولطيفة وأحمد زاهر، ومحمد رمضان، ناس كتير أوي ومش عايزة أنسى حد عشان محدش يزعل مني.
وتابعت حورية: أتولدت وعيشت بره ودرست في مدارس داخلية طول عمري، كنت طول عمري محتاجة للحنية ومحستهاش من وأنا طفلة وعمري ما تخيلت إني هحس الحب والحنان والحنية والطيبة في آخر أسبوع لما جاني ورم في الرحم، والدكتور طلب يتم استئصال الرحم بالكامل وده معناه اني مش هيبقى عندي أي أطفال، زعلت شوية بس الحمد لله أنا راضية، تخيلت ولاد أخواتي هما ولادي وأي طفل هيبقى ابني ومش زعلانة الحمد لله.
وأردفت حورية فرغلي: الحاجة الغريبة إن تليفوني مبطلش رن وناس مش بيتشتغلوا في الفن وكمية الدعاء والحب مكنتش مصدقة نفسي لدرجة إن ده حصل من غريب، ومحصلش من قريب ودي حاجة كانت مأثرة فيا أوي، لقيت 40 نفر دخلوا عليا وساكنين في العماير اللي حوليا جابولي شوكولاته وورد وعصير وكيك وقعدنا نتكلم لمدة ساعة ونص أو ساعتين، الموضوع ده اداني باور إني لازم أرجع تاني وأقف قدام الكاميرا وأعمل أعمال أحسن من اللي عملتها قبل كده.
واستكملت حورية فرغلي حديثها، قائلةً: أنا عارفه إني في آخر سنتين كنت مختفية؛ وده كان بسبب المشاكل اللي كانت عندي ومش هتسمعوا عني عمليات ولا حوادث وهحاول على قد ما أقدر وهحاول اختار الحاجات اللي بتحبوها زي حكايات بنات وساحرة الجنوب، الشغل مش كتير أوي اليومين دول وده رزق في الآخر وربنا يبعت، فيه عملين بحضرلهم مع أستاذ خالد الحجر وأستاذ أكرم فريد.
واختتمت حورية فرغلي حديثها، قائلةً: بقول شكرًا لكل حد دعالي وكل حد جالي وجابلي ورد مش عارفه أقولكم شكرًا قد إيه وفخورة إني مصرية؛ لأن ميتهيأليش إن فيه بلد تانية عملت كده مع فنانة مرت بظروف صعبة والبلد كلها وقفت معايا من سوهاج والأقصر.
