حالة من الغضب، تملكت عدد كبير من نجوم الفن، وذلك بعد تعرضهم لأزمات كثيرة خلال صيف 2023، والتي عكرت صفو استمتاعهم بالأجواء الصيفية لهذا العام.
كانت من بين هذه الأزمات وهي الأكثر انتشارا وتشغل بال المواطنين المصريين وهي انقطاع الكهرباء؛ حيث أعلنت الحكومة المصرية أن ما يحدث بهدف تخفيف الأحمال لفترة مؤقتة.
وهناك أزمة أخرى بات البعض يعاني منها، وهي ارتفاع الأسعار في الساحل الشمالي، حيث ذكروا أن زجاجة المياة يصل سعرها نحو 200 جنيه.
فنانون يشكون من انقطاع الكهرباء
وكان من أوائل الفنانين الذين أعربوا عن غضبهم من انقطاع الكهرباء هو الفنان تامر حبيب؛ حيث كتب عبر فيسبوك: امبارح بالليل ساعة ونص والنهاردة الصبح ساعة واربعين دقيقة.. احنا كده بنبعد عن الراس حبة حبة واحنا متعودين على الدقة والشفافية.
كما كتب منشور آخر: يعني يصح برضه و احنا في ٢٠٢٣ اظبط مواعيدي مع مواعيد انقطاع التيار الكهربائي ؟ و ده بجد علي فكرة.
وأما عن الإعلامي أسامة منير؛ فقد كتب عبر فيسبوك: آسف إني بصورلكم في الضلمة لأني معنديش كهرباء في المكتب، الكهرباء قطعت، وعايز أسأل الامتحان اللي نزلتهولنا وزارة الكهربا بورقة المواعيد، دا معناه أيه، دي حاجة ما خدنهاش في المنهج هنجاوب عليها أزاي”.
وأضاف أسامة منير: بما أن المنهج كان صعب أوي للدرجة دي، عايز أسأل حضراتكم وممكن تجاوبوني، هي من إلا عشرة إلى و10 هتقطع، ولا من إلا عشرة هتقطع ساعة، أو و10 هتقطع ساعة، أو من إلا عشرة حتي و10، أو أي وقت هتقطع ساعة، طيب من إلا عشرة حتي وعشرة أي ساعة. يعني الصبح الظهر أو بالليل”.
وأكد أسامة منير في رسالته “طيب خلوا التحميلات دي… مش عارف، أحنا حالنا واقف، عندي حاجات مش عارف أصورها، حاجة تحزن، دي أشغال وشركات والدنيا خربانة”.
وعبر أسامة منير عن حزنه بسبب انقطاع الكهرباء قائلًا: “أنا النهاردة مينفعش أبقى عايش بالشكل دا، وعندي سؤال (هو انقطاع الكهرباء بقى رسمي؟) أول مرة في حياتنا نشوف انقطاع الكهرباء بقى معتمد بجدول، هو أحنا وصلنا للجدول وصلنا لأن يكون انقطاع الكهرباء بجدول رسمي!”.
وفي رسالته لوزير الكهرباء، قال أسامة منير: “السيد وزير الكهرباء تهل علينا بطلعتك البهية، تقول لنا أي حاجة، تحكي لنا، يمكن نتعاطف معاك ونحس بحجم الأزمة، أنما تسيبنا كدا.
وأردف منير: المستشفيات اللي فيها عمليات جراحية، والناس اللي علي أجهزة تنفس صناعي، والناس اللي في العناية المركزة، والأطفال المولودة وكبار السن، هنعمل فيهم أيه.. دي مصيبة في حد ذاتها!”
وقال أسامة منير: “الحمد لله طبعًا ونشكر ربنا، إن حفلة الأستاذ تامر حسني والاستاذ عمرو دياب لم ينقطع فيهم الكهرباء، لأن لو انقطعت الكهرباء في الحفلتين كان حدث تحرشات، وكانت بقيت مجازر في الحفلة”.
كما طالب أسامة منير من وزير الكهرباء أن يتحدث للمصريين عن حالة انقطاع الكهرباء، فقال: “أسأل وزير الكهرباء يتعطف علينا ويصور لنا فيديو يشرح لنا فيه الوضع لنتعاطف معك ونتحمل، كلنا نقدر نتحمل المسئولية وكلنا بنحب بلدنا ونتحمل بلدنا وعايزين نشوفها أحسن بلد في الدنيا، لكن شاركونا الحدوتة، والفكرة، علشان نفهم.
المخرجة منال الصيفي استغاثت بمتابعيها، بسبب انقطاع الكهوباء وحاجة زوجها الفنان أشرف مصيلحي للتنفس الصناعي والإجهزة الخاصة به.
ونشرت “الصيفي” استغاثتها عبر حسابها الرسمي على “فيس بوك” قائلة: “طيب الكهرباء قاطعة والشكاوي مرفوعة من الخدمة وعندي في البيت حالة مرضية بتستخدم أجهزة تنفس بتشتغل بالكهرباء وحالة مش سهلة الحل ايه ده كده حرام”.وكشفت “منال الصيفي” مطلع العام الجاري عن تدهور الحالة الصحية لزوجها الفنان أشرف مصيلحي وإيداعه إحدى غرف العناية المركزة لتلقي العلاج وكان يعاني من التهاب في الدم نتيجة الأدوية التي كان يعتاد تناولها بسبب وعكة صحية سابقة تعرض لها.
فنانون اشتكوا من ارتفاع أسعار الساحل الشمالي
وأعربت الممثلة الشابة ملك أحمد زاهر عن استياءها من أسعار الساحل الشمالي وقالت: “أنا ماشية في إجراءات بيع كليتي عشان أكمل يومين في الساحل الشمالي، إيه الأرقام اللي بشوفها في الساحل الشمالي دي؟ أنا مرعوبة حاسة إني في حلم، أرخص حاجة هنا في الساحل بـ 375 ألف جنيه وغالبا بتكون المياه ودي أقل حاجة هنا، فين أيام الساحل الطيب أما كنا بنصحى 10 الصبح وكنا بنتفرج على مسرحية العيال كبرت يوميا ودون ملل ومبسوطين فين الأيام دي”.
فيما أعربت الفنانة جوري بكر عن استيائها الشديد من أسعار المطاعم في منطقة الساحل الشمالي، مشيرة إلى أن هناك استغلالا في الأسعار بشكل مبالغ فيها، معلقة: “أنا متضايقة من اللي بيحصل في الساحل، ولولا إن جوزي بيحب يروح هناك مكنتش جيت”.
وقالت جوري بكر، خلال ستوري على حسابها الرسمي بموقع تبادل الصور والفيديوهات “إنستجرام”: “أنا بكره الساحل أو الأصح اللي بيحصل في الساحل، وأنا متضايقة من اللي بيحصل في الساحل، ولولا إن جوزي بيحب يروح هناك مكنتش جيت”.
وأضافت: “فيه قلة أدب بتحصل، وفيه ناس قليلة الأدب، وفيه قلة أدب في الأسعار، وفيه ناس ممكن تقولي ايه اللي وداكي، بس أنا مضطرة، وأنا الحمد لله راضية بس إيه الأسعار دي؟”.
وتابعت: “أنا أي مكان هدخله مش هيعجبني أسعاره هفضحه على السوشيال ميديا، لأن إنتوا حرفيا بتسرقوا الناس، عشان يومين تلاتة جايين ينبسطوا فيهم فيالا تعالى أستغلك وأطلع كل الفلوس اللي في جيبك، يعني إيه عيل صغير يروح يجيب إزازة مياه بـ 200 جنيه، هي مياه من الجنة!”.
وواصلت الفنانة جوري بكر الهجوم على ارتفاع الاسعار بالساحل الشمالي، ونشرت منشورا جديدا تقول من خلاله: “الموضوع كبر وكويس إني فتحت عين الناس على حاجات كتير بتحصل، كان بالنسبالي الموضوع مش هزار على فكرة، أنا كنت بتكلم بجد أنا برضو إنسانة طبيعية زي أي حد، بتعب أنا وجوزي ومتغربين عشان نعيش عيشة كريمة لينا ولأولادنا”.
وأضافت جوري بكر: “بنتعب عشان نجيب فلوس، والناس اللي مفكرة إننا بناخد ملايين، أنا أدفع براحتي لكن ليه أحس إني بتسرق، واللي بتنقدني وبتقول إيه يا فنانة ما تدفعي ولو معكيش متروحيش، لأ مش هدفع أنا إزازة مياه بالسعر ده ولا ساندويتش برجر بـ 375 جنيها ولا قهوة، وعلى فكره دي مش مياه بس ده أكل وشرب ولبس، ارحموا من في الأرض يرحمكم من في السماء”.
وواصلت: “فين حماية المستهلك في أسعار بعض الأماكن اللي في الساحل، الناس نفسها تنبسط، في ناس تانية عايشة على قفا ناس تانية والهبل كتير”.
واختتمت جوري بكر: “بلدنا جميلة والأماكن جميلة.. أنا بحب كل مكان في البلد دي، وناس كتير تشهد من إسكندرية، شرم، جونة، غردقة، ساحل، أنا بس بكره الاستغلال، وللأسف معظم اللي حوالينا بقوا وحشين وجشع وطمع وقرف، أنا بقول حقائق وربنا يكون في عون الجميع”.
