كشفت الفنانة أنغام العديد من الأسرار عن طفولتها وبدايتها الفنية التي بدأت بتعليمها للموسيقى في سن السادسة من عمرها، موضحة أن طريقة تعليمها كانت قاسية.
طفولة أنغام
وقالت أنغام خلال حوارها في برنامج AB TALKS:” اتعلمت الموسيقى وأنا عندي 6 سنين وطريقة تعليمي كانت قاسية، وكنت بلعب بيانو وأنا صوابعي متكسرة من البرد وساعات نومي قليلة، ولكنه كان مسئولية كبيرة”.
تصريحات أنغام
وأضافت أنغام: “بشوف نفسي محظوظة، ولكن البيت مكنش أسعد حاجة مكناش الأسرة السعيدة، وكانوا بيتعاملوا معايا على إني كائن فاهم وكنت بشيل حاجات مكنتش عايزة أشيلها، وجزء من المعاناة، وأمي كانت طفلة من جواها وعلى الحياة اللي كانت فيها”.
وتابعت أنغام: “أنا استوعبت أمور وأنا طفلة مكنتش عايزه استوعبها، أب وأم مش سعداء مع بعض، والأم أكتر مكنتش سعيدة كانت مقهورة ومش محبوبة كفاية من الراجل، وده بينعكس على الطفل اللي في البيت”.
أصعب المواقف في طفولة أنغام
وبشأن أصعب موقف مر عليها في طفولتها، أردفت أنغام: “عمري ما أنسى أول مره أبويا مد ايده على أمي، وأنا كنت بحب أبويا في طفولتي بشكل هستيري، هما في اليوم ده معرفوش يداروا، لزقت نفسي في الحيطة وهو كان جاي يسلم عليا قولتله لأ متسلمش عليا، زعلت جدًا علشان أمي واتاخدت منه وشوفته شخص تاني”.
