أنا برفض صداقة الرجالة.. والحديد بيخليني شبه الحصان

كشفت الفنانة ياسمين صبري، حقيقة ارتباطها العاطفي، وموقفها من الزواج، لافتة إلى أنها تعاني من مشكلة خوف بعض الناس من الاقتراب منها أو طلب الزواج منها.

وقالت ياسمين صبري خلال لقائها ببرنامج “الحكاية” الذي يقدمه الإعلامي عمرو أديب بقناة “إم بي سي مصر”: “مش كل الناس تقدر تيجي تكلمني، وبيخافوا ويقولوا إحنا مش قدها هنقدملها إيه، وأول لما يفكر أي شخص كده ثقته في نفسه بتنزل”.

شخصية ياسمين صبري والحب

ولفتت ياسمين صبري: “في الحقيقة أنا أتحب فعلا، بس أنا إنسانة واقعية، مش بعرف أمثل على الناس، أنا بنت بلد مش اسبور، عمرك ما هتشوفني في حفلة ولا في الساحل الشمالي، ولكن في الصور بس.. أنا محافظة طبعا، وأفتخر، لإني كل يوم الميزة بتاعت المحافظة بتبقى نادرة وجدتي ست كبيرة ربتني في بيت فيه أصالة وصلاة وعبد الحليم حافظ.. وكنت بشيل الصاج بتاع الكحك وأروح للفرن وكنت باكل الكحك كله، وجدتي ست قوية وذكية، ولها بصمة في حياتي”.

وتابعت: “أي راجل هييجي هيحبني، إلا لو شيطان اللي هو سيئ للآخر، وجاي يضرني، وأنا معنديش فكرة الانتقام.. أنا مهتمة بنفسي ثم نفسي، لحد لما تيجي حاجة أهتم بيها”.

وأكدت: “معنديش صديق رجل، مفيش إلا صديقتين، صعب أوي يكون ليا صديق رجل لإن ممكن يكون لي مشاعر، وأنا النموذج بتاعي محبش يكون لي صديق رجل لإن الموضوع هيبقى غريب بالنسبة لي، لإن ممكن نتصور صورة وتنتشر والناس تفهم القصة غلط، وأنا بحب أي مأكولات بحرية”.

قالت ياسمين صبري: “بلعب رياضة من وأنا عندي 4 سنين وجدتي وديتني ألعب سباحة، وكنت بعوم بشكل احترافي وخضت بطولات باسم مصر، ولما سِبت السباحة وعمري 18 سنة كملت رياضة، مقدرش أوقف رياضة لإني لو وقفت رياضة جسمي يوجعني”.

سر لعب ياسمين صبري الحديد

وأضافت: “لعبي الحديد بيعمل تقسيم للجسم وبيخلي الست شبه الحصان وده نوع جمال أنا بحبه، بحب الست اللي ممشوقة، وحركة فتحة الحوض إتعلمتها على كبر لما كنت في كوريا بزور مصنع العدسات ومكنتش عارفة أنام بسبب فارق التوقيت فقلت هاروح الجيم الساعة 5 الصبح ملقتش ولا ماكينة فاضية، فلقيت شاشة كبيرة جدا فيها ست بتلعب يوجا بتعمل حركات المرونة الجسدية يوجا، أنا مرنة عقليا وجسديا والواحد لما بيبقى مرن مبيتكسرش لا عقليا ولا جسديا”.

ولفتت: “بلعب رياضة ساعة ونصف و70 دقيقة يوجا، وأنا بستمتع بالرياضة وبعملها بمزاج زي القراءة مش متعذبة، اليوجا حلوة لتنظيم النفس وميبقاش فيه هرمون التوتر”.

وعن العلاقات الزوجية، أشارت ياسمين صبري إلى ذكاء المرأة: “كل ست ليها مؤشر، هي تضحك على نفسها هي حرة بمزاجها بس من جوا عارفة الحقيقة وعارفة إذا كان الراجل منبهر بيها أو صادق أو كذاب أو مخادع أو جاد أو مش جاد”.

في نفس اللقاء، قالت الفنانة ياسمين صبري: “محدش يعرف أنا عندي قد إيه في البنك علشان يقولوا لحقت تعمل كل ده إمتى، الطائرات الخاصة اللي بركبها دي عقود شغل، والطائرات مبتعملش إنسان، الإنسان هو اللى بيعملها ودي ممكن تتحط على التوك توك”.

شخصية ياسمين صبري 

ولفتت: “أنا بنت مصرية مسلمة عربية، أمثل بنات كتير أوي مصريات وعرب ومسلمات، أنا أول عربية وصل لـ كيرتيه، الجمال مبقاش ميزة لإنه بيتعمل في أي مطبعة تجميل والجميلات كتير وفيه وفرة في الجمال، إنما القصة في الشخصية أنا شخصية قبل ما أكون جميلة، والتقل الإنسان يكون تقيل ولا ينكسر وشخصية”.

طموح ياسمين صبري

وأضافت ياسمين صبري:”أنا بحب القراءة جدا مع إني مكنتش في المدرسة شاطرة، وطول عمري طموحة والطموح بيفرق في حياة الإنسان، انا ليا 3 أشقاء بس أنا غيرهم ومختلفة عنهم، بس أنا معشتش دور الضحية ولا علقت الشماعات ولا الاستعطاف، من صغرى أنا طموحة في كل شيء، وطبعا محظوظة وأنا اللي أصنع الحظ بفضل ربنا، وأنا ليا شغل غير التمثيل وبتصور لماركات عالمية وبستثمر شخصيتي وجمالي علشان أكون سفيرة ماركات عالمية”.

عمرو أديب يمازح ياسمين صبري

وتابعت ياسمين صبري: “الحلاوة بتزود الحظ لو استخدمت صح لإن أحيانا الحلاوة بتضيع لو استخدمت غلط”، ليعقب عمرو أديب: “انتي في ليفل الوحش؟ لترد الفنانة ضاحكة:”مش عارفة إيه اللي أنت شايفة؟ ليؤكد الإعلامي: “في ليفل الوحش.